विम्बल्डन रद्द झाल्याने या तीन खेळाडूंच्या मनसुब्यावर पाणी

wimbledon cancelled due coronavirus

kheliyad.sports@gmail.com
M. +91 80875 64549

         

करोना विषाणूच्या महामारीमुळे Coronavirus | फ्रेंच ओपन टेनिस स्पर्धा १८ मार्च २०२० मध्ये पुढे ढकलण्यात आली त्याच वेळी विम्बल्डनच्या wimbledon open 2020 | भवितव्याबाबत चर्चा झडू लागल्या होत्या. अर्थात, तरीही आयोजकांना एक आशा होती, की विम्बल्डन किमान नियोजित तारखेला होईलच; मात्र तसे काहीही झाले नाही. जेथे ऑलिम्पिकसारख्या क्रीडाकुंभाला ग्रहण लागले, तेथे विम्बल्डनची काय बिशाद! अखेर 29 जून 2020 पासून होणारी विम्बल्डनही रद्द करावी लागली. विम्बल्डन रद्द होणे हीच टेनिसविश्वातील ऐतिहासिक नोंद म्हणायला हवी. रॉजर फेडरर, सेरेना विल्यम्स आणि व्हीनस विल्यम्स यांच्यासाठी हा मोठा धक्का आहे. चाळिशी गाठलेल्या या तीन खेळाडूंना कारकिर्दीचा समारोप विम्बल्डनशिवाय करावा लागण्याची नामुष्की ओढवणार आहे.


टेनिसच्या इतिहासात विम्बल्डन रद्द करण्याची नामुष्की आयोजकांवर ओढवली आहे. दुसऱ्या महायुद्धानंतर प्रथमच ही स्पर्धा रद्द करण्यात आली आहे. टेनिसविश्वातील सर्वांत प्रतिष्ठेची मानली जाणारी विम्बल्डन wimbledon | रद्द झाल्याने क्रीडाप्रेमी हिरमुसले असतीलही, पण ही स्पर्धा रद्द होणे अपरिहार्य होते. ऑल इंग्लंड क्लबवर होणारी एकमेव ग्रासकोर्ट ग्रँडस्लॅम स्पर्धा रद्द झाल्याने टेनिस सत्र पूर्णतः अस्ताव्यस्त झाले आहे. तत्पूर्वी फ्रेंच ओपन French Open | यापूर्वीच पुढे ढकलली आहे. मुळात 7 जूनपर्यंत होणाऱ्या सर्वच स्पर्धा रद्द करण्यात आल्या आहेत. विम्बल्डन स्पर्धा तर 29 जूनपासून होती. मात्र, करोनाविरुद्ध संपूर्ण विश्वानेच युद्ध पुकारल्याने विम्बल्डन स्पर्धाही गुंडाळण्यात आली. ही स्पर्धा रद्द झाल्याने सर्बियाचा नोवाक जोकोविच Novak Djokovic | आणि रोमानियाच्या सिमोना हालेपचे Simona Halep | एकेरी किताब जिंकण्याचे मनसुबे धुळीस मिळाले. न खेळताच हा किताब त्यांच्यापासून दुरावला असं म्हंटलं तर ते चूक ठरणार नाही. करोना विषाणूच्या संक्रमणाने संपूर्ण युरोपलाच विळखा घातला आहे. या महामारीमुळे एक एप्रिल 2020 पर्यंतच जगभरात 8 लाख 40 हजारपेक्षा अधिक लोक संक्रमित झाले होते आणि 40 हजारांवर लोक मृत्युमुखी पडले होते. अशा परिस्थितीत विम्बल्डनचा विचार नतद्रष्टपणा ठरला असता. तरीही एप्रिलच्या पहिल्या आठवड्यात आयोजकांनी या स्पर्धेबाबत आशा कायम ठेवल्या होत्या. प्रेक्षकांशिवाय ही स्पर्धा आयोजित करण्याचाही प्रस्ताव त्यांच्यासमोर होता. मात्र, प्रेक्षक नसतील तर ती विम्बल्डन स्पर्धा कसली! त्यामुळे आयोजकांनी प्रेक्षकांशिवाय स्पर्धा घेण्यास नकार दिला होता. मात्र, कोणताही विचार करण्यापूर्वी वाट पाहा, असे आवाहन तीन वेळा विम्बल्डनचा विजेता ठरलेला बोरिस बेकर याने ट्विटद्वारे आयोजकांना केले होते. तो म्हणाला, ‘‘मला पूर्ण विश्वास आहे, की विम्बल्डनवर कोणताही निर्णय घेण्यापूर्वी एप्रिलअखेरपर्यंत वाट पाहायला हवी.’’ मात्र, आयोजकांनी महिनाभराची वाट पाहण्यापूर्वीच दोनच दिवसांत स्पर्धा रद्द करण्याची घोषणा केली.

विम्बल्डन रद्द झाल्याने कोणाचे नुकसान?

विम्बल्डन रद्द झाल्याने तीन दिग्गज टेनिसपटूंना मोठा झटका असेल. ते म्हणजे रॉजर फेडरर, सेरेना विल्यम्स आणि व्हीनस विल्यम्स यांना. कारण या तिन्ही दिग्गज खेळाडूंची ही स्पर्धा कारकिर्दीतली अखेरची स्पर्धा ठरणार होती. किंबहुना ही स्पर्धा खेळूनच ते टेनिसविश्वातून निवृत्तीची घोषणा करू शकले असते.  कारण फेडरर आणि सेरेना २०२१ च्या स्पर्धेपर्यंत वयाची चाळिशी गाठतील, तर व्हीनस 41 वर्षांची होईल. सेरेनाला कामगिरी उंचावण्याचे आव्हान असेल. कारण गेल्या वर्षी ती विजेतेपदाच्या लढतीत सिमोना हालेपकडून पराभूत झाली होती. असे असले तरी सेरेनाच्या नावावर आजही 23 ग्रँडस्लॅम आहेत आणि तिला ऑस्ट्रेलियाच्या मार्गारेट कोर्टच्या Margaret Court | विक्रमाशी बरोबरी साधण्यासाठी केवळ एका ग्रँडस्लॅम किताबाची गरज आहे. इंग्लंडसारख्या हिरव्या गवताच्या कोर्टवर जिंकण्याच्या ईर्षेनेच ती खेळणार होती. दुर्दैवाने ही स्पर्धाच रद्द झाल्याने सेरेनाची आव्हानं आणखी खडतर झाली आहेत. उन्हाळ्यानंतर किंवा हिवाळ्यापूर्वी जरी या स्पर्धा आयोजित केल्या असत्या तरी त्यांची सायंकाळ मात्र तेवढी लांबणार नाही हेही तितकंच खरं आहे. विम्बल्डनमध्ये सर्वांत जास्त काळ सामना खेळून तो जिंकण्याचा विक्रम करणारा अमेरिकेचा जॉन इस्नर John Isner | उद्वेगाने म्हणाला, की विम्बल्डन रद्द होण्याचे वृत्त पचविणे काहीसे जडच जाईल. इस्नर एटीपी रँकिंगमध्ये 21 व्या क्रमांकावर आहे आणि अमेरिकी खेळाडूंमध्ये तो अव्वल स्थानी आहे. इस्नेरने 2010 मधील विम्बल्डनच्या पहिल्या फेरीत फ्रान्सच्या निकोलस माहूटचा 11 तासांपेक्षा अधिक काळ चाललेल्या सामन्यात पराभव केला होता. हा सामना तीन दिवस सुरू होता, ज्यात पाचवा सेट 70-68 अशा गुणांवर संपुष्टात आला.

सबातिनी म्हणते, घरीच स्वस्थ राहा

करोना विषाणूच्या संक्रमणामुळे जगभरातील स्पर्धा रद्द होत असल्याने टेनिसच्या स्पर्धाही त्याला अपवाद राहिल्या नाहीत. अशा स्थितीत जेव्हा विम्बल्डन स्पर्धा रद्द होण्याचे संकेत मिळू लागले तेव्हा अर्जेंटिनाच्या गॅब्रिएला सबातिनीलाही अस्वस्थ केले. एकेकाळची दिग्गज टेनिसपटू म्हणून गणलेली आणि माजी यूएस ओपनची विजेती असलेल्या ४९ वर्षीय सबातिनीलाही जाणीव झाली, की आता टेनिसची कोणतीही स्पर्धा होणे अशक्य आहे.

‘‘हे अतिशय निराशाजनक आहे. आपल्याला कोणालाही हे सांगता येत नाही, की ही महामारी केव्हा समाप्त होईल. कदाचित आपल्याला भविष्याचा विचार करायला आवडत असेल, पण आता तसा विचार करता येणार नाही. जगात सर्वत्र एकसारखी स्थिती आहे आणि अशा स्थितीत घरात राहणेच उत्तम आहे.’’ - गॅब्रिएला सबातिनी, माजी टेनिसपटू, अर्जेंटिना

विम्बल्डनचे प्रमुख रिचर्ड लुईस यांनीही चिंता व्यक्त केली. ते म्हणाले, की 2020 मध्ये एकही टेनिस स्पर्धा होणे अशक्य आहे. हा अंदाज अवास्तव अजिबात नाही. सर्व काही लवकर सामान्य होईल याचीही कोणी शाश्वती देऊ शकणार नाही.

आयटीएफच्या अध्यक्षांनी स्वतःच्या वेतनात केली कपात

करोना विषाणूच्या संक्रमणामुळे अनेकांवर बेरोजगारीची कुऱ्हाड कोसळली आहे. क्रीडाविश्वातही अनेकांचे रोजगार धोक्यात आले आहेत. अशा स्थितीत आंतरराष्ट्रीय टेनिस महासंघाने (आयटीएफ) ITF | आपल्या कर्मचाऱ्यांच्या मदतीसाठी अनेक उपाययोजनांची घोषणा केली. महासंघाचे अध्यक्ष डेव्हिड हगर्टी यांनी आपल्या वेतनातून ३० टक्के कपातीचीही घोषणा केली. एटीपी आणि डब्लूटीए स्पर्धा मार्च २०२० मध्येच निलंबित केल्या होत्या आणि आता विम्बल्डन स्पर्धाही रद्द झाल्याने १३ जुलै २०२० पर्यंत कोणतीही टेनिस स्पर्धा होण्याची कोणतीही शक्यता नाही. आयटीएफने तशाही अनेक स्पर्धा रद्दच केल्या आहेत. यात पुरुष चॅलेंजर टूर आणि महिला टेनिस टूरचाही समावेश आहे. अशा स्थितीत महासंघाने नोकऱ्या वाचविण्यासाठी अनेक योजना जाहीर केल्या.